១, លោក John Locke

​កើត​នៅក្នុង​ឆ្នាំ​១៦៣២ និង​ស្លាប់​ទៅវិញ​នៅក្នុង​ឆ្នាំ​១៧០៤ លោក John Locke គឺជា​ទស្សនវិទូ​ដ៏​មាន​ឥទ្ធិពល និង​ល្បីល្បាញ​មួយរូប​របស់​អង់គ្លេស និង​ត្រូវបាន​គេ​ចាត់ទុកថា ជា​សេដ្ឋកិច្ចវិទូ​មួយរូប​ដែល​បាន​ត្រួស​ត្រាយផ្លូវ​បង្កើត ទ្រព្យសម្បត្តិ​ឯកជន (Private Property) ឡើង​សម្រាប់​ពិភពលោក​ទាំងមូល​។​

២, លោក David Ricardo

​លោក David Ricardo បានកើត​នៅក្នុង​ឆ្នាំ​១៧៧២ និង​ស្លាប់​ទៅវិញ​នៅក្នុង​ឆ្នាំ​១៨២៣​។ គាត់​គឺជា​អ្នកសេដ្ឋកិច្ច​នយោបាយ​ដ៏​មាន​ឥទ្ធិពល​មួយរូប​របស់ អង់គ្លេស ដែល​បាន​បង្កើត​ទ្រឹស្ដី​សំខាន់ៗ​អំពី​ការ​ការធ្វើ​ពាណិជ្ជកម្ម​ដោយ​សេរី (Free Trade) និង​ការបង្កើតឡើង​ដំបូង​នូវ​របប​មូលធននិយម (Capitalism) នៅលើ​សាកលលោក​។​

៣, លោក Irving Fisher

​កំពូល​អ្នកសេដ្ឋកិច្ច​អាមេរិក​ លោក Irving Fisher បានកើត​នៅក្នុង​ឆ្នាំ​១៨៦៧ និង​ស្លាប់​ទៅវិញ​នៅក្នុង​ឆ្នាំ​១៩៤៧​។ គាត់​ត្រូវបាន​គេ​ចាត់ទុកថា ជា​សេដ្ឋកិច្ចវិទូ​ដ៏​ល្បីល្បាញ​ជាពិសេស​នៅក្នុង​សតវត្ស​ទី​២០ ដែល​បានបង្ហាញ​ទ្រឹស្ដី​សំខាន់ៗ​ជុំវិញ​អតិផរណា ប្រាក់​បំណុល (Debt Deflation) និង គោលនយោបាយ​សេដ្ឋកិច្ច (Economic Policy) ជាច្រើន​ទៀត​។​

៤, លោក Joseph Schumpeter

​មិន​ខុសពី​លោក Irving Fisher ទេ លោក Joseph Schumpeter គឺជា​សេដ្ឋកិច្ចវិទូ​ជនជាតិ​អូទ្រីស​កូនកាត់​អាមេរិក​ដ៏​មាន​ឥទ្ធិពល​នៅ ក្នុង​សតវត្ស​ទី​២០​។ កើត​នៅក្នុង​ឆ្នាំ​១៨៨៣ និង​ស្លាប់​នៅក្នុង​ឆ្នាំ​១៩៥០ លោក Joseph បាន​បង្កើត​គោលការណ៍​ពិសេស​សម្រាប់​ជំនួញ​ពាណិជ្ជកម្ម​ដូចជា វដ្ត​ពាណិជ្ជកម្ម (Business Cycles) ជាដើម​។

៥, លោក Friedrich A. Hayek

​បានកើត​នៅក្នុង​ឆ្នាំ​១៨៩៩ និង បាន​ស្លាប់​នៅក្នុង​ឆ្នាំ ១៩៩២​។ លោក Friedrich A. Hayek មាន​ដើមកំណើត​ជា​ជនជាតិ​អូទ្រីស ដែលជា​សេដ្ឋកិច្ចវិទូ​ដ៏​ល្បីល្បាញ​ម្នាក់ទៀត​ដែល​បាន​យក​គោលការណ៍ ប្រជាធិបតេយ្យ (Democracy) និង​ទីផ្សារសេរី (Free Markets) ជាសំខាន់​សម្រាប់​ការអភិវឌ្ឍ​ជាតិ ប្រឆាំង​ទៅនឹង​អ្នក​សង្គមនិយម (Socialist) នៅ​អំឡុង​ពាក់កណ្តាល​សតវត្ស​ទី​២០​។​

៦, លោក Alan Greenspan

​លោក Alan Greenspan គឺជា​សេដ្ឋកិច្ចវិទូ​ដ៏​ល្បីល្បាញ​មួយរូប​របស់​អាមេរិក​ដែល​បានកើត​នៅ ក្នុង​ឆ្នាំ​១៩២៦​។ គាត់​បាន​ដើរតួនាទី​យ៉ាងសំខាន់​ក្នុងការ​ត្រួសត្រាយ​ឲ្យ​មាន​គំរូ ម៉ាក្រូសេដ្ឋកិច្ច (Macro-Economist Model) និង​ការព្យាករណ៍​សេដ្ឋកិច្ច​ជា​ជំនាញ​ពិសេស​របស់គាត់​សម្រាប់​រដ្ឋាភិបាល សហព័ន្ធ​អាមេរិក​។​

៧, លោក Milton Friedman

​ទើបនឹង​ទទួលមរណភាព​កាលពី​ឆ្នាំ​២០០៦ ក្នុង​អាយុ ៩៦​ឆ្នាំ លោក Milton Friedman គឺជា​អ្នកសេដ្ឋកិច្ចវិទូ​ដ៏​ល្បី​មួយទៀត​របស់​អាមេរិក​ដែលមាន បទពិសោធន៍​ផ្នែក​សេដ្ឋកិច្ច​អស់​រយៈពេល​ជាច្រើន​ឆ្នាំ​ក្នុងការ គាំទ្រ​ឲ្យ​មាន​លំហូរ​ទីផ្សារសេរី (Free Market Flow) និង​កំណត់​អំណាចរដ្ឋាភិបាល​កុំ​ឲ្យ​ជ្រៀតជ្រែក​កិច្ចការ​ផ្ទៃក្នុង​របស់ ក្រុមហ៊ុន​ឯកជន​។

៨, លោក Karl Marx

​ប្រិយមិត្ត​ពិតជា​ធ្លាប់បាន​ឭ​ឈ្មោះ​សេដ្ឋកិច្ចវិទូ​ជនជាតិ​អាល្លឺម៉ង់ រូបនេះ ដែលមាន​ឥទ្ធិពល​បំផុត​នៅ​ពាក់កណ្ដាល​សតវត្ស​ទី​១៩​។  កើត​នៅក្នុង​ឆ្នាំ​១៨១៨ និង​ស្លាប់​នៅក្នុង​ឆ្នាំ​១៨៨៣ លោក Karl Max ត្រូវបាន​គេ​ចាត់ទុកថា​ជា​បិតា​សេដ្ឋកិច្ចវិទូ​សង្គមនិយម (Father of Socialist Economics) ដែល​បានផ្ដល់​ទ្រឹស្ដី​សំខាន់ៗ​លើ​គោលការណ៍​សេដ្ឋកិច្ច ពលកម្ម​ការងារ និង​ការទំនាក់ទំនង​របស់​វា​ទៅនឹង​របប​មូលធននិយម​។

៩, លោក John M. Keynes

​មាន​ដើមកំណើត​ជា​ជនជាតិ​អង់គ្លេស លោក John M. Keynes គឺជា​អ្នកសេដ្ឋកិច្ចវិទូ​ដ៏​មាន​ឥទ្ធិពល​នៅក្នុង​សតវត្ស​ទី​១៩​។ កើត​នៅក្នុង​ឆ្នាំ ១៨៨៣ និង​ស្លាប់​នៅ​ឆ្នាំ​១៩៤៦ Keynes គឺជា​អ្នកបង្កើត​ទ្រឹស្ដី និង​ការអនុវត្ត​ផែនការ​ម៉ាក្រូសេដ្ឋកិច្ច​សម័យ​ទំនើប (Modern Macro-economics) និង​គោលនយោបាយ​សេដ្ឋកិច្ច​របស់​រដ្ឋាភិបាល​។

១០, លោក Adam Smith

Adam Smith បានកើត​នៅក្នុង​ឆ្នាំ​១៧២៣ និង​ស្លាប់​នៅក្នុង​ឆ្នាំ​១៧៩០​។ លោក​គឺជា​ទស្សនវិទូ និង​ជា​បិតា​សេដ្ឋកិច្ច (Father of Economics)​ដ៏​មាន​ឥទ្ធិពល​របស់​ប្រទេស​ស្កុ​តឡែ​ន​។ Adam Smith ឲ្យ​និយមន័យ​សំខាន់ៗ​លើ​ផលប្រយោជន៍ និង​កម្មសិទ្ធិឯកជន​ដែល​បុគ្គល​គ្រប់រូប​ត្រូវ​ទទួលបាន​នៅក្នុង​សង្គម របស់ខ្លួន​៕

ប្រភព៖ opposingviews , ann